Beasaingo Udala k Igartza Monumentu Multzoko barruko zein kanpoko argiteria azpiegitura osoa berritu du. Udalerriko erreferente historiko eta kultural nagusiaren xarma nabarmentzeko eta azpiegitura energetiko gaurkotua lortzeko xedez egin du Udalak inbertsio hau. Azken belaunaldiko LED teknologia ezarri da jauregian, zubian, errotan nahiz inguruko eremuetan, eraikinen arkitektura errespetatuz eta gaueko esperientzia bisual eta seguruagoa eskainiz.
Berritze honek erantzuna ematen dio orain arteko sistemaren zaharkitzeari eta horrek sortzen zituen mantentze-kostu nahiz kontsumo altuei. Proiektuaren bidez lau ardatz nagusi lotu ditu Udalak: ondarearen balioztatzea, argiztapenaren erabilpen aniztasuna eta praktikotasuna, eraginkortasun energetikoa eta aurrezpena, eta ingurunearen zaintza.
Argiaren intentsitatea eta kolore-tenperatura epelak aukeratu dira, Igartzako harrizko zein egurrezko egitura historikoak eta arkitektura-xehetasunak era orekatuan azpimarratzeko. Barne argiteriaren diseinu eta konfigurazio aukerei esker, jarduera desberdinek behar dituzten argiztapen beharrei erantzuteko gai da, hala nola kontzertu, erakusketa edo hitzaldiak.
Teknologia berriarekin urteko argindar-kontsumoan %40eko aurrezpen garbia lortu da, 28.765,70 kWh gutxiago kontsumituz urtean. Ondorioz, 8,141 tona CO₂ gutxiago isuriko dira, kudeaketa jasangarriaren eta trantsizio ekologikoaren bidean mugarri bat ezarriz. Kanpoko argiteria berriak argia behar den lekuetara soilik bideratzen du, argi-kutsadura saihestuz eta Oria ibaiko ekosistema zein bertako fauna babestuz.
Kanpoko bideetako argiterian arreta berezia jarri da. Jarritako farola berriek altzairu gortenezko akabera dute, Igartzako historian hain garrantzitsua izan den burdinari eta erdoilari keinu eginez. Gainera, farolek presentzia-sentsore adimendunak dituzte, norbait hurbiltzen denean argi-maila automatikoki igotzen da eta norberarik ez dagoenean kontsumoa gutxitzen da.
Barrualdeko argiak ere berritu dira, eraikinen egurra eta harria babestuz. Argien jatorria ezkutatu egin da eraikinei beren protagonismoa emanez. Sistema berriak argi-konfigurazio desberdinak ahalbidetzen ditu, unean uneko beharren arabera molda daitekeena.
Inbertsio publiko honek Beasaingo erakargarritasun turistiko eta kulturala indartzen du. Argiteria berriak eta argiaren kalitate hobetuak gaueko bisita gidatuak eta kultur ekitaldiak antolatzeko aukera berriak irekitzen ditu. Igartzak bere ondare-balioa eta jasangarritasunarekiko konpromisoa berresten ditu.
Proiektu honek 555.550,76 euroko inbertsio osoa izan du eta Europar Batasunak finantzatu du osorik, Suspertze, Eraldatze eta Erresilientzia Planaren barruko Europar Batasuneko Next Generation funtsen bidez.
