Gipuzkoako Euskal Pilota Federazioak antolatutako Gipuzkoako Herriarteko Pilota Txapelketaren edizio berri honetan, Goierriko sei udalerrik hartuko dute parte. Lehiaketa hainbat modalitatetan banatuko da, eta herri bakoitzak bere espezialitatean neurtuko ditu indarrak.
Eskuzko modalitatean, Lazkao, Zaldibia eta Zegama izango dira ordezkariak. Aurtengo edizioan, nabarmentzekoa da azken urteetan parte hartu duten Ataun eta Beasain ez direla lehiatuko, azken honek iaz finalerdietara iritsi bazen ere.
Larruzko paleta eta pala motzezko kategorian, Lazkao, Olaberria eta Ordizia arituko dira. Bestalde, gomazko paletazko lehiaketan, Zumarraga izango da Goierriko ordezkari bakarra. Zesta-puntan, ordea, ez da txapelketarik izango, bi herrik baino ez baitute izena eman.
Txapelketaren aurkezpen-zozketa apirilaren 21ean egingo da, asteartean, arratsaldeko 19:00etan, Donostiako Kirol Etxean. Eskuzko eta gomazko paletazko partidak maiatzaren lehen asteburuan hasiko dira, eta larruzko paleta eta pala motzezkoak, berriz, maiatzaren 10eko asteburuan. Rural Kutxak eta Aramendia gozotegiak babestuko dute ekitaldia, aurreko edizioetan bezala.
