Ordizia izango da 2026ko Goierriko Jazzaldiaren egoitza nagusia, uztailaren 1etik 4ra bitartean. Lau egunez luzatuko den ekimenak jazz musikaren topagune izatea du helburu, adin guztietako ikus-entzuleei kalitatezko kultur eskaintza eskainiz.

Antolakuntzak nabarmendu du egindako lanaren kalitatea, urteetan zehar parte hartu duten musikarien zerrendari erreparatuz gero. Era berean, babesle eta laguntzaileen sostengua eskertu dute, halako kultur ekimen bat aurrera eramateko ezinbestekoa baita erakundeen laguntza.

Aurten ere, kalitate handiko eta askotariko gonbidatuak izango dira protagonista, kontzertu bereziak, estilo ezberdinak eta maila handiko musikariak tartean.

Uztailak 1ean, asteazkena, 21:00etan Sugaar tabernan, Dj Makala-k zabalduko du jaialdia 'Jazz. Soul, Funk… eta DJak' kontzertu-hitzaldiarekin. Mikel Unzurrunzaga zarauztarraren proiektu honek bere ibilbide artistikoaren errepasoa eskainiko du.

Uztailak 2an, osteguna, 22:00etan Udaletxeko arkupeetan, Madrilgo Esencia Ternaria afro-perutar jazz hirukoteak joko du. Brian Aching, Mateo Vazquez eta Jose Raul Machadok osatzen dute taldea, Peruko kostaldeko soinu-aberastasuna eta inprobisazioa nahastuz.

Uztailak 3an, ostirala, bi emanaldi izango dira Plaza nagusian. Lehenik, 20:30ean, Aretxabaletako NHIL taldeak pop organikoa, soul eta R&B eraginak uztartuko ditu. Gero, 23:00etan, suitzar abeslari eta konpositore Lea Maria Fries arituko da, jazza, soula eta pop esperimentala nahastuz.

Uztailak 4an, larunbata, ere emanaldiak izango dira Plaza nagusian. 19:00etan, Zirriborro Jazz Band-ek, Edorta de Pedro-ren zuzendaritzapean, Goierriko Musika eskolei eskainitako tartea beteko du. Ondoren, 20:30ean, Bartzelonako Hip Horn Brass Collective brass bandak New Orleanseko tradizioa hip hop, funk eta jazz garaikidearekin nahastuko ditu. Jaialdia Daniel Migliosi luxenburgotar tronpetistaren eskutik itxiko da, 23:00etan, Europako jazz belaunaldi berriko izen interesgarrienetako bat.