Bertsozale Elkarteak jakinarazi duenez, eskualde bakoitzak ordezkari bana izango du txapelketaren final-laurdenetan. Tolosaldean Alegiako Boskatu, Goierrin Zumarraga Urretxu 1, Urolan Azpeitiako Zaharrak Berri, Urola Kostan Zarauzko Allepunta, Buruntzaldean Hernani, Donostia-Oarso-Bidasoan Irungo Txingudi A, Debagoienan Leintz eta Debabarrenan Xarmaginak taldeek hartuko dute parte.
Bigarren fasea apirilaren 17an, ostiralean, hasiko da Zaldibiako kultur etxean, arratsaldeko 19:00etan, Boskatu eta Zumarraga Urretxu 1 taldeen arteko kanporaketarekin. Hurrengo egunean, apirilaren 18an, larunbatean, Zaharrak Berri eta Allepuntak kantatuko dute Azpeitian.
Bigarren asteburuko saioak apirilaren 24an eta 25ean izango dira, Hernanin eta Soraluzen, hurrenez hurren. Lehenengoan Hernani eta Txingudi A arituko dira, eta bigarrenean Leintz eta Xarmaginak. Final-aurrekoak maiatzaren 9an eta maiatzaren 16an jokatuko dira, eta Aiako finala maiatzaren 30ean izango da.
Bestalde, Euskaltzaindiak antzerki gaualdi bat antolatu du Baionan apirilaren 17rako, ostirala, Herriko Etxearekin eta Euskararen Erakunde Publikoarekin batera. Bi ikuskizun eskainiko dira Biltxoko espazioan, arratsaldeko 19:00etan hasita, sarrera doakoa izanik aretoa bete arte.
Gehibat konpainiak Xabin Fernandezek idatzitako Zaku berekoak antzezlana taularatuko du, idazlea bera aktore dela. Gainera, Pantzo Hirigaraik, Mizel Sarratiak, Beñat Bidegainek, Peio Larrek, Armand Jaunarenak eta Anje Duhaldek Hautagaia aurkeztuko dute, Pantzo Hirigarairen testuarekin.
