Gipuzkoako Herriarteko Bertsolari Txapelketako finala Aiako Bertsozale Elkarteak antolatutako egun osoko egitarauaren barruan jokatuko da larunbatean. Egitarauak bertso poteoa, bazkaria eta saioa aurreikusten zituen, baina bertso poteoa bertan behera geratu da.
Bertan behera uztearen arrazoia da 12:30ean Errenterian egingo den kontzentrazioa. Bertan, bertso irakasle batek bere posizioa eta erreferentzialtasuna botere harremanak garatzeko eta erasotzeko erabili dituela salatuko dute.
Urretxu eta Zumarragako bertso eskolak, bi herrietako udalen laguntzarekin, autobusa antolatu du finalera joateko. Autobusa 11:00etan aterako da Elizkaletik. Ohiko ibilbidea aldatuz, zuzenean Aiara joan beharrean, lehenik Errenteriara joango da, bertan nahi duen orori kontzentraziora batzeko aukera emanez.
Finalaren ostean, 21:30ak aldera itzuliko da autobusa Aiako finalgunetik. Zerbitzua doakoa izango da eta herritar guztiak gonbidatuta daude parte hartzera. Izena emateko, bertso eskolako kideekin harremanetan jarri behar da Instagramen @martxoanbertsoa kontuaren bidez edo zubertsotan2023@gmail.com helbidera idatzita.
