Ekainaren 20an egin zuten etapa honetan, mendizaleek iragarritako beroa, ibilbidearen luzera eta ezaugarriak kontuan hartuta, ordubete lehenago hasi zuten jarduera. Hala ere, bidean haize handia, euria eta "bero ikaragarria" izan zituzten.
Lagun Onak mendi bazkunak azaldu duenez, Otzaurtetik San Adriandik barrena Aitzkorri tontorrera igo ziren lehenik, eguraldi paregabearekin. Tontorrean, ordea, haize izugarria eta euria topatu zituzten. Ondoren, Urbia tik Andreaitz era arteko tartea ateri eta tenperatura onean egin zuten, baina handik aurrera beroa izan zen nagusi Zerain, Mutiloa eta Beasainera arteko ibilbide luzean.
"Oso polita" izan arren, eguraldiak baldintzatuta hamar ordu eta erdian bukatu zuten mendizaleek etapa hau.
Egitasmoko azkenaurreko etapa, Beasain-Elosua artekoa, udako oporren ondoren aurreikusi dute, irailaren 19rako. Zazpi etapatan 171 kilometroko ibilbidea osatuko dute guztira, Azpeitian hasi eta bukatuko denak.
Aurretik, otsailean egin zuten lehen etapa (Azpeitia-Tolosa), martxoan bigarrena (Tolosa-Larraitz), apirilean hirugarrena (Larraitz-Lizarrusti) eta maiatzean laugarrena (Lizarrusti-Otzaurte). Irailaren 19ko etapak seigarrenari egingo dio bide, eta urriaren 24an Elosua-Azpeitia (25 km) izango da azkena.
