Lehen final-laurden honetan, Zumarraga-Urretxu 1 taldea eta Alegiko Boskatu taldea lehiatuko dira. Saioa ostiralean, arratsaldeko 19:00etan, izango da Zaldibiako herri antzokian, bertsolaritza zaleen aurrean.
Zumarraga-Urretxu 1 taldeko bertsolariak Antton Fernandez, Mikel Iturriotz eta Manex Mantxola dira. Alegiko Boskatu taldea, berriz, Iker Arandia, Egoi Irazustabarrena eta Eneko Ontsalo bertsolariek osatzen dute. Txapelketaren formatuak talde bakoitzak gai-jartzaile bat eta epaile bat ere izatea eskatzen du.
Goierriko taldearen gai-jartzailea Leire Akizu da, eta epailea Jon Mendizabal. Tolosaldeko taldearen kasuan, gai-jartzailea Pello Olano da, eta epailea Aratz Irazustabarrena.
Zaldibiako saioaz gain, beste hiru final-laurden jokatuko dira: Azpeitian apirilaren 18an, Hernanin apirilaren 24an eta Soraluzen apirilaren 25ean. Lau talde sailkatuko dira finalerdietara, hauek maiatzaren 9an Oñatin eta maiatzaren 16an Tolosan izango direlarik. Txapelketaren final handia Aiako Probalekuan ospatuko da maiatzaren 30ean.
