Taldekideek Instagram sare sozialeko kontu baten bidez eman dute egitasmoaren berri, eta bertan partekatu dute hiru eguneko egitaraua. Ekitaldiak larunbatean, abuztuaren 8an, hasiko dira Marianitada Girotuarekin. Arranopola Txarangak girotuko du ekitaldia, Ordizia tabernatik 12:30ean abiatuta.
Ondoren, 14:30ean, bazkari herrikoia antolatu dute. Txartelak Urka tabernan lor daitezke jada. Arratsaldean, 16:30ean, ZKN Brothers-en eskutik DJ ibiltaria arituko da. Egitarauari amaiera emateko, 18:30ean, indarkeria matxistaren aurkako argazkia egingo dute Santa Maria elizan.
Abuztuaren 9an, Palestinarekin Elkartasunak deitutako manifestazioarekin bat egingo dute antolatzaileek, 19:00etan. Azkenik, abuztuaren 13an, 20:00etan, Kunbialarik kontzertua eskainiko du, eta gaua girotzeko DJak arituko dira.
