Futbolariak 17:15ean iritsi ziren Loinazko San Martin plazara, kopa eskuetan zutela. Bertan, Beasain KE-ko futbol eskolako gaztetxoek ohorezko pasabidea egin zieten udaletxeko sarreraraino, herritar ugari txaloka eta animatzen ari zirela.
Ondoren, 17:30ean, ekitaldi instituzionala egin zen. Leire Artola alkateak harrera ofiziala egin zien bi kirolariei, eta Loinatz jaietako zapia eta oroigarri bana jaso zituzten.
Giroa erabat berotu zen 17:45ean, Aritz Elustondo eta Beñat Turrientes udaletxeko balkoi nagusira atera zirenean kopa beasaindarrei eskaintzera. Plazan bildutako zaleek pozarren erantzun zioten ekitaldiari. Balkoitik bertatik, bi futbolariek adierazi zuten "plazerra" dela kopa herrikideekin partekatzea, eta Loinatz jai onak pasatzea opatu zioten herriari.
Garaipenaren ospakizunak herriko jaien eztandari eman zion lekua: 18:00etan, La Salleko ikasleek, gainerako ikastetxeetako ordezkariekin batera, txupinazoa jaurti zuten, Loinatz jaiei hasiera ofiziala emanez. Jaiak maiatzaren 24ra arte ospatuko dira Beasainen.
