Beasaingo Udalak, BKL klubak eta Euskal Saskibaloi Federazioak antolatutako ekitaldiak izango dira aurten ere. Lehenengo ekitaldia larunbatean izango da, Antzizar kiroldegian, 17 urtez azpikoen arteko 3x3 txapelketa batekin. Zortzi neska talde eta zortzi mutil talde arituko dira lehian.

Nesken txapelketa goizean izango da, eta mutilena arratsaldean. Finalak hasi aurretik, Euskal Saskibaloi Federazioak denboraldiko sariak banatuko ditu. Aurten, Pedro Etxarri (Ordizia), Alfredo Salazar (Araba) eta Txiki Arza (Bizkaia) omenduko dituzte saskibaloiari egindako ekarpenagatik.

Gainera, hainbat goierritar sarituko dituzte: Hector Gutierrez (Ordizia Orkli) eta Xabier Gorostegi (Ordizia Kuko Jatetxea) entrenatzaile onenak, eta Elorri Garcia (Ordizia Orbinox) eta Natale Ena (Ordizia Kuko Jatetxea) jokalari onenak.

Ekainaren 12an, 20 urtez azpiko emakumezkoen Euskal Selekzioak Eslovakiaren aurka jokatuko du Beasainen. Aurretik, hilaren 11n, Zarautzen arituko dira. Bestalde, 20 urtez azpiko gizonezkoen Euskal Selekzioak Portugalen jokatuko duen txapelketa bat prestatzeko egonaldia egingo du Beasainen, Hungaria, Txekia eta Portugalekin batera.

Federazioak nazioarteko harremanak lantzen jarraitzen du, nahiz eta ofizialtasuna lortzea ez den erraza izaten. Horregatik, Portugalgo txapelketa garrantzitsua da, beste bide batzuk ireki ditzakeelako.