Beasaingo Udalak eta Aranzadi Zientzia Elkarteak elkarlanean jarraitzen dute bertako ibarbasoa berreskuratzeko eta espezie inbaditzaileak herriko ibaietatik desagerrarazteko. Aste honetan amaitutako landaketekin osatu da udan Oria ibaian hasitako zabor-bilketa eta landare arrotzen erauzketa kanpaina. Herriguneko lau eremutan jardun da: kiroldegi inguruan, Joan Iturralde kalean, Bideluze plazan eta Jose Migel Iturriotz kalean.
Aurtengo zuhaitz-landaketak Oria ibaiaren ibilbideko lau gune ezagunetan banatu dira, hain zuzen ere aurretik landare inbaditzaileak kendu ziren leku berdinetan: kiroldegiko igerilekuen eta aparkalekuaren artean, Joan Iturralde kalean (38 ale), Bideluze plazan (24 zuhaitz eta zuhaixka) eta Jose Migel Iturriotz kalean (iazko landaketak indartzeko). Landaketa hauen helburua da ibaiertzeko berezko basoa indartzea, itzala sortuz, uraren kalitatea hobetzen lagunduz eta bertako animalientzat babesleku naturalak eratuz.
Udazkeneko landaketetara iritsi aurretik, udan zehar ibaia prestatzeko kanpaina egin zen. Bertan, ibai-ibilgua garbitu eta zabor ugari atera zen, eta baita bertako landaredia itotzen duten landare inbaditzaileak kendu ere, hala nola topinaburua eta budleia edo tximeleta-zuhaixka. Lanak eskuz egin dira, inolako herbizidarik edo produktu kimikorik bota gabe.
Udaletik eta Aranzaditik gogorarazi dute ibaiak garbi eta osasuntsu mantentzea etengabeko lana dela. Datozen urteetan ere lankidetza honek aurrera jarraituko du, Beasain ingurumenaren aldetik herri atseginagoa eta biziagoa izan dadin.
