Euskadiko Txirrindularitza Federazioak zuzendaritza berria aukeratzeko prozesua abiatu zuen martxoaren hasieran, Raul Mena Rodriguez presidentearen eta zuzendaritza batzordearen dimisioaren ostean. Apirilaren 1ean bi hautagaitza aurkeztu ziren, eta horietako bat Santi Osoro Ramos (Ataun, 1969) ataundarrak gidatzen du.

Apirilaren 13an, Euskadiko Federazioaren ez-ohiko batzar nagusiak bozketa egin zuen bi hautagaitzen artean. Osororen zerrendak 73 boto jaso zituen, eta Jon Sarasua Agirre buru zuen hautagaitzak, berriz, 45 boto. Emaitza honekin, Osoro da presidente izateko hautagai nagusia.

Hautagaitza irabazlea behin-behineko izaerarekin hautatu da. Orain hiru eguneko epea dago zabalik erreklamazioak aurkezteko. Hauteskunde Batzordeak ostiralean hartuko du behin betiko erabakia, epe hori igaro ondoren.

Santi Osoro Ramos buru duen zerrenda honako hauek osatzen dute: presidenteorde gisa Axier Oiarzabal Arbaizagoitia, diruzain gisa Ibon Garcia Caballero, eta bokal gisa Urko Barriola Etxeberria eta Elene Gaztelu Deba. Ordezkoak, berriz, Iñaki Telleria Otegi, Joseba Gorostiza Abendaño, Egoitz Otegi Erauskin, Irantzu Solaguren Martinez eta Emilio Sanchez Alonso dira.