LAB sindikatuak deituta, Zubietako erraustegiko langileek greba egin zuten apirilaren 14an, euren egoera salatzeko. Mobilizazio horren baitan, elkarretaratze bat ere egin zuten Gipuzkoa plazan, Gipuzkoako Foru Aldundiaren egoitzaren aurrean.
Langileek otsailean jakinarazi zuten enpresak uko egin ziola hitzarmen propio bat negoziatzeko saiakerei. Ordutik, hainbat mobilizazio eta lanuzte egin dituzte. Apirilaren 14koa hilabete honetako lehen greba eguna izan zen, eta beste bat aurreikusita dago apirilaren 21erako.
“"Enpresak greba ilegaltasunaren mehatxua bota ondoren, martxoan greba eskubidea burutu zituzten langile guztiei ohartarazpen idatzia ezarri zien, 40 ohartarazpen inguru zigor mehatxuekin batera. Greba ondorengo bileran, langileek greba burutzeko duten legezko eskubidea urratzen saiatzeaz gain, enpresak aurrerapausorik ez zuela emango adierazi zien."
LAB sindikatuak salatu duenez, Ekobal enpresak, Zubietako erraustegia kudeatzen duenak, “atzerapausoak eta mehatxuak” erabili ditu. Sindikatuak gogorarazi du Ekobal Gipuzkoako Foru Aldundiak kontratatutako Ekondakin enpresaren azpikontrata dela. Hori dela eta, langileek Aldundiaren aurrean elkarretaratuko dira, azpikontratazio kate honen arduradun nagusia interpelatzeko eta lan-baldintzak hobetzeko konponbideak eskatzeko.
