Usurbilgo Udalak bake epaile ordezkoaren lanpostua betetzeko deialdia berriro ireki du. Lanpostu hori hutsik geratu zen iragan udazkenean egindako lehen deialdian inor ez zelako aurkeztu. Deialdiaren iragarkia Gipuzkoako Aldizkari Ofizialean argitaratu zen apirilaren 20an, eta eskaerak aurkezteko epea hilabetekoa izango da, apirilaren 21etik aurrera.
Interesdunek zinpeko aitorpena aurkeztu beharko dute, deialdian eskatutako baldintza guztiak betetzen dituztela eta legeak ezarritako ezgaitasun edo bateraezintasunik ez dutela adieraziz. Horrez gain, hautaketa prozesurako egoki iritzitako merituak eta curriculum vitaea ere aurkeztu beharko dituzte. Baloratuko diren merituak bizilekua, curriculuma eta euskararen ezagutza izango dira.
Eskaerak udal erregistroan edo Administrazioko Jardunbidea arautzen duen Legediak xedatutako eran aurkeztu ahal izango dira. Iragarkian hautaketa prozesuari buruzko eskubide, betebehar, gaitasun eta bateragarritasun baldintza guztiak zehazten dira.
Hau da udalbatzak bake epaile ordezkoa hautatzeko egiten duen bigarren deialdia hilabete gutxian. Lehen saiakera irailaren 25ean egin zen, EAEko Auzitegi Nagusiko Gobernu Idazkaritzaren idatzi baten ondoren. Orduan, hautagai bakarra aurkeztu zen, eta hura bake epaile titular izendatu zuten azaroaren 26ko osoko bilkuran, EAEko Auzitegi Nagusiko Gobernu Idazkaritzak izendapena onartu ondoren. Ordezkorik ez zegoenez, lanpostu hori hutsik geratu zen.
Martxoaren 2an, EAEko Auzitegi Nagusiko Gobernu Idazkaritzak idatzi bat bidali zion Udalari, bake epaile ordezkoa izendatzeko prozedura abiarazteko eskatuz. Udalbatzak, hautaketa hauek bideratzeko eskumena duenez, prozesu berri hau abiaraztea onartu zuen martxoaren 26ko osoko bilkuran.
Bake epaile ordezko izateko hautagaiek espainiar estatuko nazionalitatea izan beharko dute, adinez nagusi izan, eta Botere Judizialeko Lege Organikoko 102., 302., 303. eta 389. artikuluek kargu judizialetarako aurreikusitako ezgaitasun eta bateraezintasun kausak ez eduki. Bizilekua, curriculuma eta euskararen ezagutza ere baloratuko dira.
