Azpeitian, Gipuzkoan, egingo den ekainaren 19ko jardunaldiak nekazaritza eta elikadura sistemen inguruko ikuspegi juridikoa izango du ardatz. Udako Euskal Unibertsitateak (UEU) antolatutako hitzordu honetan, politika publikoetan elikadura burujabetza, agroekologia eta tokiko proiektuak garatzeko dauden aukerak eta erronkak aztertuko dira, betiere ikuspegi kritiko eta eraldatzailetik.

Antolatzaileen arabera, "askotan, lege-esparrua oztopo gisa bizi da agroekologiarentzat, elikadura-burujabetzarentzat edo tokiko proiektu txikientzat. Beste batzuetan, ordea, aukera eta tresna ere izan daiteke eraldaketa sozialerako".

Jardunaldiak sei hitzalditan eta bi mahai-ingurutan jorratuko du gaia. Lehenengo hitzaldian, Patxi Iriart (EHLGko kidea) eta Maribi Joaristi (Oiartzungo Udaleko idazkaria) arituko dira Lurraren kudeaketa publikoa EHan lantzen, tokiko erakundeentzako aukerak aztertuz. Ondoren, Marinaleda eta Tantai Kooperatibako kideek lurraren kudeaketa publikoa eraldaketarako nola erabili daitekeen azalduko dute.

Nekazarien lan baldintzak ere izango dira hizpide. Europako Nekazaritza Politika Bateratua aztertuko dute Joseba Andoni Terreros (Jaurlaritzako Landa Garapeneko zuzendaria) eta Ainhoa Lete (Bergarako alkateordeak). Bestalde, Menorcako eta Oiartzungo esperientziak partekatuko dituzte Vicenç Tur (Menorcako udal idazkaria) eta Iker Sarriegi (Elika kooperatibako kidea) kideek.

Eguerdian bazkalostean, bi lantegi egingo dira: lehenengoan, "Nola elikatu gure herriak agroekologiatik eta politika publikoen esparrutik?" galderari erantzungo diote; bigarrenean, berriz, "Lurra eta Lana zehazten elikadura-estrategia herrikoietan" aztertuko da jardunaldia ixteko.

UEU, EHU-Gezki, Biolur, Landaola eta Ekintzakoop eragileek elkarlanean antolatu dute jardunaldi hau, Mirene Begiristain koordinatzaile dutela.