Aurkezpenean azpimarratu dutenez, arnasguneak eta lurgune euskaldunenak funtsezkoak dira euskararen biziraupenerako, eta horiek babestea eta sendotzea ezinbestekoa da. Dinamika hau joera negatibo bati aurre egiteko sortu da, izan ere, aurreikuspenen arabera, euskarak atzera egingo luke datozen urteetan, baita eremu euskaldunenetan ere.
Martin Aramendi UEMAko lehendakariak adierazi du mankomunitatearen kezka handia dela arnasguneen gainbehera, eta etorkizuneko aurreikuspenak are okerragoak direla. Horregatik, joera hori aldatzearen garrantzia azpimarratu du, arnasguneek euskararen biziberritzean motor izan daitezen.
“"UEMAk argi du arnasguneak eta lurgune euskaldunena giltzarriak direla euskararentzat, eta eremu horiek babestea eta sendotzea ezinbestekoa dela, euskararen lurralde osoan eragin dezaten eta euskararen biziberritzean motor izan daitezen."
Dinamikaren abiapuntua UEMAk 2025eko uztailean argitaratutako Norantz doa euskara? Hego Euskal Herria, 2036 ikerketa izan zen, zeinak arnasguneen ia desagerpena aurreikusten zuen hamarkada batean. Ikerketa horren aurrean, Bertsozale Elkarteak mankomunitatearekin harremanetan jarri zen, egoerari buelta emateko prestutasuna adieraziz.
Guztira hemezortzi eragilek hartu dute parte ekimenean, besteak beste, AEK, Bankoa Abanca, Bilgune Feminista, ELA, Euskadiko Futbol Federazioa, Euskaldendak Konfederazioa, Euskalgintzaren Kontseilua, Euskal Herriko Bertsozale Elkartea, Euskal Pilota Federazioa, Fagor Taldea, Hekimen, IKA, Kutxabank, LAB, Laboral Kutxa, Lanartea eta Plazaola Partzuergo Turistikoa. Bakoitzak bere arlotik konpromiso zehatzak hartu ditu euskararen erabilera sustatzeko.
“"Galera, gainbehera, atzera eta akabera errima sendoak dira, baina horien aurrean guk beste batzuk aldarrikatu nahi ditugu: euskara indarberritzeko aukera, pizkundearen hasiera eta konpromisoaren bandera, arnasguneak eta udalerri euskaldunak sendo ikusteko ostera."
UEMAk dinamika herriz herri zabaltzeko asmoa du, hitzaldiak, foroak eta eragileekin bilera zuzenak antolatuz, eragileak ahalduntzeko eta kontzientziatzeko helburuarekin.
