Martxoaren 16an hasi ziren Orioko saneamendu sistema konpontzeko lanak, eta Gipuzkoako Ur Kontsortzioak apirilaren 10ean bukatuko zituela aurreikusi zuen. Hala ere, udalak jakinarazi duenez, lanen bilakaeran aldaketak izan dira, eta ondorioz, bihartik ostiralera bitartean aurreikusita zeuden zereginak atzeratu egingo dira.

Orain arte egindako lanek eragina izan dute herriguneko trafikoan, batez ere Eusko Gudari kalean, Kaia kalean eta Abeslari kaleko azken tartean. Dena den, udalak argitu du bihartik ostiralera bitartean ez dela aldaketarik izango trafikoan. Lanak berrekiteko data berriak aurrerago jakinaraziko direla adierazi du.

Lan hauek udal saneamendu sarearen mantentze eta berritze lanen barruan kokatzen dira. Udalaren arabera, azken azterketek agerian utzi zuten sareko zenbait puntutan konponketak egin behar direla, lotuneak irekita daudelako, hoditeriak pitzadurak dituelako eta haustura arriskua dagoelako. Horregatik, kolektore batzuk berritzen eta konpontzen ari dira.