Gipuzkoako Foru Aldundiko Ingurumen Sailak nazioarteko RITA (Regional Impact Trade Alliance) topaketaren hirugarren jardunaldia hartu du ostiralean, Donostiako Naturklima Fundazioan. Ekimen honek Europa, Latinoamerika eta munduko beste hainbat lekutako ehun pertsona baino gehiago bildu ditu, trantsizio ekologikoan eta ekonomia zirkularrean adituak direnak, inpaktu positiboan oinarritutako merkataritza eredu berri bat aurrera eramateko helburuarekin.
Jardunaldiak, gainera, Gipuzkoako berrogeita hamar enpresaren parte hartzea izan du. Hauek, trantsizio ekologikoarekin, ekonomia zirkularrarekin, industria jasangarriarekin, energia komunitateekin eta berrikuntza enpresarialarekin lotutako esperientziak eta proiektuak partekatu dituzte.
José Ignacio Asensio, Ingurumeneko diputatuak, azpimarratu duenez, "Gipuzkoak berriro ere erakusten du talentua erakartzeko, nazioarteko aliantzak sortzeko eta jasangarritasunaren eta berrikuntzaren erreferente gisa kokatzen jarraitzeko gaitasuna". Era berean, nabarmendu du "Naturklima espazio estrategiko gisa sendotzen ari dela erronka global handiei aurre egiteko konponbide partekatuak bultzatzeko".
Jardunaldiaren irekiera instituzionalean parte hartu zuten RITAko, ECODESeko, Eusko Jaurlaritzako eta Gipuzkoako Foru Aldundiko Ingurumen Saileko ordezkariek. Ondoren, Gipuzkoan bultzatutako hainbat politika eta proiektu aurkeztu ziren, trantsizio ekologikoaren eta lehiakortasun jasangarriaren arloan.
Jardunaldian landutako edukien artean, nabarmentzekoak dira Gipuzkoan bultzatutako trantsizio ekologikoko politikak, energia komunitateak eta biltegiratzea, hiri eta industria hondakinekin lotutako ekonomia zirkularreko estrategiak, baita Mondragon bezalako erreferentziazko eredu enpresarial kooperatiboak ere.
Era berean, lan mahaiak egin ziren ordezkaritza instituzionalen, enpresen eta nazioarteko eragileen artean, energia, mugikortasun jasangarria, turismoa, elikagaiak, industria edo ekonomia zirkularra bezalako arloei buruz.
Ingurumen Sailak adierazi duenez, topaketa honek "Gipuzkoaren posizionamendua indartzen du jasangarritasunaren, berrikuntzaren eta nazioarteko lankidetzaren arloan erreferente gisa, eta baita Gipuzkoako enpresa ehunaren papera ikusgarri egitea ere, eraldaketa ekonomiko eta ekologikoan funtsezko eragile gisa".
RITA topaketa lurraldeen aliantza global baten parte da, zeinak eskualdeak "ekonomia berri justuago, jasangarriago eta kolaboratiboago bat eraikitzeko protagonistak" gisa kokatzea helburu duen. Topaketa honek jarraipena eman dio 'Adierazpena Euskaditik. Eskualdeen eta Inpaktuaren Merkataritzaren Aliantza Global baterantz' ekimenari, ECODES eta nazioarteko beste eragile batzuekin batera bultzatua.
