Euskal Herrian Euskaraz (EHE) erakundeak euskaltzale independentistak Azpeitian elkartzeko deia egin du apirilaren 24 eta 25 ean, Euskaltzale Independentisten II. Topaketan. Martxoaren 13an aurkeztu zen bi eguneko egitarau osoa, eta ordutik irekita daude tailerretarako izen-emateak, Internet bidez. Saio hauek doakoak izango dira, baina parte hartu nahi dutenek galdetegi bat bete beharko dute.
Gainera, larunbateko beste bi ekitalditarako sarrerak ere eskuragarri daude oraindik Interneten: Azoka Plazan egingo den bazkarirako eta Sanagustin aretoan gauean eskainiko diren kontzertuetarako. Kontzertuetan Tapia eta Leturia Band eta Maruxak taldeek joko dute. Sarrerak Entradium atarian eros daitezke, bazkarirako soilik, kontzertuetarako soilik, edo bi ekitaldietarako balio duten konbinatuak.
EHEk, beste hainbat eragilerekin elkarlanean, egitarau anitza prestatu du. Apirilaren 24an, ostirala, 18:00etan “Ongi etorri Euskararen Errepublikara” ekitaldia izango da, eta 20:30ean kontzertu akustikoa Orkatz tabernan. Gauean, 22:00etan, pala partidak jokatuko dira: Martija-Prieto vs. Sanchez-Alkorta (pala motza) eta Urain-Gutierrez vs. Aizpuru-Rosa (gomazko paleta).
Apirilaren 25ean, larunbata, goizean 10:00etatik 12:00etara “Euskaratik independentziara” mahainguru nagusia egingo da. Ondoren, 12:30ean, Joaldunak izango dira, eta 13:00etan ekitaldi politikoa. Bazkaria 14:00etan izango da. Arratsaldean, 16:00etatik 19:00etara, tailerrak egingo dira bi txandatan, gai anitzak jorratuz, hala nola gazteak eta aisialdia euskaraz, desobedientzia zibila, egoera soziolinguistikoa, mural margoketa, intersekzionalitatea, Euskararen Errepublika eta kultur sistema. 19:00etan musika kalean izango da, eta 22:00etan kontzertuak Tapia eta Leturia Band eta Maruxak taldeekin. Ondoren, DJak arituko dira Orkatz eta Korrale tabernetan.
Topaketen inguruko xehetasun gehiago ezagutu nahi dituztenek aukera izango dute ostegun honetan Orkatzen. Martxoaren 13ko aurkezpen ofizialaren ondoren, apirilaren 9an aurkezpen informalago bat prestatu dute, pintxo-potearekin eta musikarekin girotuta.
