LAB sindikatuak prentsa ohar bidez jakinarazi duenez, lanuztea apirilaren 17ra arte luzatuko da. Grebaren aurreabisua apirilaren 1ean erregistratu zen Eusko Jaurlaritzako Ekonomia, Lan eta Enplegu Sailean, enpresaren borondate falta salatuz prebentzio, segurtasun eta lan osasuneko hutsuneak konpontzeko.
Datu horiek ez dira estatistika anker bat gizentzeko erregistro hutsak, baizik eta langileen osasuna eta bizitza bera arriskuan jartzen dituen ekosistema baten isla.
Sindikatuaren arabera, 2025eko abuztuaren 8tik 2026ko martxoaren 31ra bitartean hainbat lan istripu gertatu dira Estaños Matienan. Horietako batek, joan den urtarrilaren 31n izandakoak, langile gazte baten heriotza eragin zuen. LABek azpimarratu duenez, enpresak muzin egin die langileen saiakerei prebentzioa antolatzeko eta lan osasuneko araudia behar bezala txertatzeko.
Aitzitik, enpresak mehatxu, jarrera autoritario eta gardentasun faltarekin erantzun die langileen ordezkariei, informazioa ezkutatuz eta erantzukizun oro baztertuz. Langileek aspalditik salatu dituzte hainbat arrisku, hala nola makineriaren egoera kaskarra, mantentze lan falta eta produktu kimikoen eragina osasunean. Istripu hilgarriak egoera muturrera eraman zuen, prebentzio neurriak berehala indartzeko premia agerian utziz.
Langileek salatzen dutenez, enpresak ez ditu beharrezko neurriak hartu langileen osasuna zaintzeko eta segurtasuna bermatzeko. Gainera, fede txarrez eta opakotasunez jokatu du langileen ordezkaritzarekin harremanetan, eskaerei erantzunik eman gabe, erantzunak atzeratuz, prebentzio ordezkariari informazioa ukatuz eta lan ikuskaritzaren txostena arrazoirik gabe ezkutuan mantenduz.
LABek gaineratu du enpresak, gertatutako lan istripuen gaineko ardura ukatzeaz gain, sindikatuko ordezkaria mehatxatu duela, informazioa publiko eginez gero ekintza legalak abiatuko dituela adieraziz. Langileen ustez, enpresaren politika prebentzioaren oinarrizko printzipioen aurkakoa da, eta horrek zuzenean arriskuan jartzen ditu langileen segurtasuna eta osasuna.
