Herritar ugari elkartu ziren bertan, orkestrak eskainitako egitarauaz gozatzeko. Kontzertua Juan Crisostomo Arriagaren Los esclavos felices obraren oberturarekin hasi zen, konpositore bilbotarraren heriotzaren bigarren mendeurrena gogoratuz. Jarraian, Gustav Mahlerren 5. Sinfoniako Adagietto eta Georges Bizeten Carmen obraren 1. Suitea interpretatu zituzten.
Gainera, EGOren bi kide ohi, Silvia Ferro eta Oihan Espina klarinete jotzaileak, bakarlari gisa aritu ziren orkestrarekin batera. Antolatzaileen arabera, kontzertuak "euskal errepertorioa, erromantizismoa, indar sinfonikoa eta musikaren historiako orrialde ezagunenetako batzuk" uztartu zituen.
Atzokoa Gazte Orkestrak Euskal Herriko hainbat herritan eskainiko dituen bost emanaldi horietako bigarrena izan zen. Birak Hondarribian hasi zuen, eta Azkoitikoaren ostean, Donostian, Bilbon eta Gasteizen izango da.
