Tata eta Umore Ona taldeetako kideak prest daude jada larunbatean, apirilaren 13an, arratsaldeko 17:00etan hasiko den danborradarako. Egun handiaren aurretik, azken prestaketak egingo dituzte asteazken eta ostegunean, 19:00etan, Gurea pilotalekuan, ohi bezala.

Danborradak iazko ibilbide bera jarraituko du. Plazatik abiatuko dira danborjoleak, Balda plazara jaitsi eta bertan geldialdi bat egingo dute. Ondoren, Ibaiondo kaletik eliz atarira joango dira, eta handik berriro plazara. Bigarren geldialdi baten ostean, Umore Ona sozietatearen parera joango dira merienda egitera. Sabelak bete ondoren, Gurea Frontoira joango dira, eta han amaituko da jaia.

Aurtengo karroza Sahatsa dantza taldeari eskainiko zaio, taldeak 50 urte betetzen baititu. Danborradako kideek euskal kulturaren transmisioan urte luzez egindako ekarpena eskertu nahi diete. Horrela, karrozan aterako diren LH1eko haurrak dantzariz jantzita joango dira, baina karrozari lotutako beste xehetasunik ez da aurreratu.