Joan den asteartean egindako Astigarragako Udalaren martxoko osoko bilkuran, hainbat gai garrantzitsu jorratu ziren, eta horien artean bi obra nagusiren espedienteek aurrera egin zuten, Udalbatzaren onespenarekin.

Alde batetik, kiroldegia eraberritzeko eta handitzeko lanen obra-kontratua Construcciones Urdinberri SL enpresari esleitzea onartu zen, 8.224.568,32 euroko (BEZa barne) aurrekontuarekin. Era berean, obren zuzendaritza fakultatiboa XLARK enpresari eman zitzaion, 160.975,29 euroren truke (BEZik gabe). Esleipenak egin ondoren, Udalak bi enpresekin kontratuak sinatzeari ekingo dio, eta obrak uda aurretik hastea aurreikusten da.

Bestetik, Zarkumendegi ingurua urbanizatzeko lanen bigarren fasearen aldaketa ere onartu zuen osoko bilkurak. Proiektu horren arabera, futbol zelaiaren ondoko aparkalekua erabat berrantolatuko da, 100 aparkaleku berri sortuz, autobus geltokiarekin eta espaloiarekin batera. Gainera, berdegunea egokituko da espaloiaren eta futbol zelaiaren artean. Lizitaziorako oinarrizko aurrekontua 747.804,39 eurokoa da, eta Construcciones Moyuak hartuko du bere gain.

Horrez gain, kale izendegian zenbait aldaketa egitea ere onartu zen. INEk Udalari jakinarazi zion izen generikoen eremuak ezin direla bost karaktere baino gehiagokoak izan. Hori dela eta, eta kale izendegia homogeneizatzeko asmoz, 'enparantza' edo 'plazatxoa' izen generikoa zuten lau guneri 'plaza' izena eman zaie: Foru plaza, Errekatxo plaza, Norberto Almandoz plaza eta Ergobia plaza.

Autobus zerbitzuari buruzko lau mozio aztertu ziren osoko bilkuran, eta horietatik bik aurrera egin zuten. Norberto Almandoz plazan azokarako estalki bizia eraikitzeko obrak hasi aurretik lorategi eremuko zuhaitzak, heskaiak eta zuhaixkak birlandatzeko proposamena ez zen onartu. Autobus zerbitzuari buruzko beste hiru mozioetatik, EH Bildurenak eta MUGItu Astigarraga plataformarenak jaso zuten onespena, PSE-EEren eta EAJren abstentzioekin, hurrenez hurren.