Begoña Pedrosa Hezkuntza sailburuak, Nerea Bengoa Legutioko alkatearekin eta Maider Etxeberria zuzendariarekin batera, CEIP Garazi ikastetxea bisitatu zuen atzo, egindako erreforma lanak ikusteko. Familiak ere gonbidatu zituzten hobekuntzak bertatik bertara ezagutzera.
“"Espazioak birbanatu eta handitzea lortu dugu zentroan."
Berrikuntza honekin, ingurune funtzionalagoa sortu da, espazio guztietarako irisgarritasuna bermatuz, bai barrukoetarako bai kanpokoetarako, eta guneen arteko konexioak hobetuz. Eraikinak, hiru solairukoak, espazio moldakor eta konektatuagoak ditu orain. Beheko solairuan administrazio gunea, haur hezkuntzako espazioak eta hezkuntza komunitateari zuzendutako gunea daude, patioekin zuzeneko harremanean. Goiko solairuan, berriz, Lehen Hezkuntzako gelak eta gune komunak daude: liburutegia, informatika gela, musika gela eta erabilera anitzeko gelak.
Beste hobekuntza garrantzitsu batzuk hegoaldeko fatxadaren birgaitzea dira, eguzki babeserako sistemekin eta isolamendu termikoarekin, baita arotzeria guztiaren ordezkapena ere. 2024ko abuztutik 2026ko urtarrilera bitartean egindako esku-hartzeak 2.689.796 euroko inbertsioa eskatu du, eta 1.630 metro koadroko azaleran jardun da.
Legutioko alkateak azaldu duenez, 2025eko urtarrilean efizientzia energetikoa bultzatzeko lau jarduera egiteko aukera ikusi zuten, energia kalifikazioa hobetzeko asmoz. Esku-hartze hauek, Eusko Jaurlaritzaren lanen osagarri, sistema eraginkorragoak gehitzeko aukera eman dute, hala nola galdara berri bat, zoru erradiatzailearentzako bero-ponpa bat, geletako tenperatura erregulatzeko balbula termostatikoak eta estalkiaren isolamendua. Udalak 132.192 euroko inbertsioa egin du horretarako.
CEIP Garazi ikastetxe publikoa da, eta ia 200 haur eta lehen hezkuntzako ikasle eskolatzen ditu bi lerrotan. Zentroak Legutioko eta inguruko familiei zerbitzua ematen die.
