Jeltzaleek adierazi dutenez, Karrantzako Udala gero eta diru gehiago gastatzen ari da turismoan, baina emaitzak gero eta okerragoak dira. Haien arabera, aurreko kudeaketa jeltzalearen garaian, Pozalaguak urtean 45.000 bisitari inguru jasotzen zituen, eta gaur egun kopuru hori erdira jaitsi da.
Ez ditugu ulertzen eta ez dizkigute azaltzen hartzen ari diren neurriak, hala nola Pozalaguako kobazuloko sarreraren prezioa zazpi eurotik hamarrera igotzea edo bisita batzuk murriztea, eta horrek bisitarien jaitsieran zuzenean eragiten duela uste dugu.
EAJk azpimarratu duenez, neurri horiek, sarreraren prezioaren igoera eta bisita-txanden murrizketa kasu, bisitarien kopuruaren beherakadaren arrazoi nagusiak dira. Gainera, Karrantza Zabalaren “koherentzia politiko falta” salatu dute, lehen zerbitzu publikoak ez esternalizatzearen alde agertu arren, gobernuan sartu bezain laster turismo kudeaketa enpresa pribatu baten esku utzi baitzuten.
EAJren ustez, arazoa ez da ekonomikoa, estrategikoa baizik. Udalak uko egin dio turismo politika bat gidatzeari, non eragile guztiak kontuan hartuko liratekeen, eta horrek ondorio zuzenak ditu tokiko ekonomian, bereziki ostalaritza eta merkataritza sektoreetan. Horregatik, “inbertsio aztertuagoa” eskatu dute.
