Lagun Onak mendi bazkunak antolatutako Udaberriko Mendi Asteko hitzaldi eta ikus-entzunezkoen emanaldiak hasi ziren asteartean, Mendietxe museoan. Lehen saioa Josu Merino eskalatzaileak eskaini zuen. Atzokoan, berriz, Iker eta Eneko Pou anaiek hartu zuten hitza Soreasu antzokian, 'Lau elementuen erronka' izenburupean osatu duten kontakizun ikusgarria aurkeztuz.
Gaur, osteguna, Mikel Lizarralde mendizale eibartarrak eskainiko du hitzaldia, 19:00etan, Mendietxe museoan. Duela zortzi urte esklerosi anizkoitza diagnostikatu zioten arren, Lizarraldek ez du kirola egiteari eta mendiarekin duen harremanari eutsi. 'Zazpi' izeneko proiektuan bildu du bere ibilbidea, eta dokumental bat ere sortu du Pello Osoro eta Maite Arroitajauregi Mursego herrikideekin batera. Lan honek 2024ko Mendi Film jaialdian euskarazko film onenaren saria jaso zuen.
Zazpi izeneko proiektuan bildu du gaixotasuna diagnostikatu ziotenetik egin duen bidea, eta dokumental bat ere ondu du Pello Osoro eta Maite Arroitajauregi Mursego herrikideekin batera.
Bestalde, datorren igandean, maiatzeko azkenekoan, Xoxoteko Eguna ospatuko du Lagun Onak mendi bazkunak. Goizeko 09:00etan jarri dute hitzordua plazan, tontorrera elkarrekin igotzeko asmoz. Bertara iritsita, 12:00etan meza eta 12:45ean lore eskaintza izango dira, jarraian gaztetxoen artean dominak banatuko direlarik. Ekitaldiak paella jate batekin amaituko dira aterpean.
