Taldeak Sanagustin kulturgunean joko du abenduaren 11n. Birako sarrerak bihar, osteguna, 11:00etatik aurrera egongo dira salgai musikaze.net/peiremans webgunean.

Azpeitiko kontzertuaz gain, Peiremans taldeak beste sei emanaldi eskainiko ditu Euskal Herriko hainbat txokotan: Miarritzeko Atabalen (abenduaren 4an), Gasteizko Jimmy Jazzen (17an), Iruñeko Zentralen (23an), Donostiako Dabadaban (26an eta 27an) eta Bilboko Kafe Antzokian (29an).

Peiremans taldea 2005ean sortu zen, eta Gorka Urbizu (Berri Txarrak), Imanol Ubeda (Bide Ertzean), Haritz Beristain (Kashbad) eta Marino Goñi (Balerdi Balerdi) izan ziren sortzaileak. Urte hartan bertan, 'Peiremans+' izeneko bost kantako diskoa kaleratu zuten eta hainbat kontzertu eman zituzten.

Taldeak etenaldia egin zuen, eta 2015ean berriz elkartu ziren 'Bigarren saria' izeneko beste disko labur bat argitaratzeko. Ondoren, berriz ere zuzeneko batzuk jo eta taldea geldirik egon zen orain arte. Sare sozialetan iragarri dute aurten abenduan 'Halley Tour' birarekin itzuliko direla.