Mañariako gazte talde batek bultzatuta, herriak bere lehen Gazte Eguna ospatuko du larunbat honetan. Ekimen honen helburua herriko bizitza dinamizatzea eta gazteei zuzendutako egun bat eskaintzea da. Antolatzaileek adierazi dutenez, iazko inauterietako herri bazkarian sortu zen ideia, herria bizirik mantentzeko beharra ikusita.

Egitaraua 13:00etan hasiko da txupinazoarekin, festa giroa piztuz, eta trikitilariek girotuko dute uneoro. Ondoren, herritarrak herri bazkari batean elkartuko dira, eta bertsolariek parte hartuko dute. Arratsaldean ere hainbat proposamen izango dira.

17:30ean, koadrilen arteko olinpiadak egingo dira, eguneko ekitaldi nagusietako bat. 19:00etan, karropoteoa izango da, bozgorailu, musika eta edariz hornitutako gurdi txiki batekin kaleak girotuz. Eguna musikarekin amaituko da. 22:00etatik aurrera, Estutu eta Fitoskins taldeek kontzertuak eskainiko dituzte, eta ondoren DJ Pan con Txitxarronen saioarekin jarraituko du festak.