Leitzan jai giro biziak jarraitzen du. Ostegun honetan, goizeko diana eta entzierroaren ondoren, Leitzako erraldoi eta buruhandien konpartsa aterako da plazatik herrian zehar ibiltzeko, 10:30ean. Aurten, gonbidatu berezia izango dute: Kataluniako Llinar del Valles herriko konpartsa, umeen gozamenerako kalejiran parte hartuko duena. Ondoren, 11:30ak aldera, goxokiak banatuko dituzte.
Eguerdiko 13:00etan, txakoli dastaketa eta Incansables txarangaren emanaldia izango da karrapean. Arratsaldean, 17:00etan, zezenak aterako dituzte plazara. Hauek amaitutakoan, 18:30ean, bertso saio bat iragarri dute plazan, non Maialen Lujanbio, Amets Arzallus, Ekhiñe Zapiain, Joanes Illarregi eta Xabat Illarregi ariko diren kantuan.
Gauean, 21:30ean zezensuzko bat izango da, eta 22:00etan, herri afariari emango zaio hasiera. Gauerditik aurrera, berriz, Incansables txarangak gaueko erronda egingo du.
Asteazkeneko jai egitarauak ere ekitaldi ugari izan zituen. Goizean, pilota festa izan zen Amazabal pilotalekuan, eta umeentzako gune berezi bat antolatu zuten kultur taldekoek labaderoan beroari aurre egiteko. Nagusientzat, paella jan bat egin zen karrapean, Incansables txarangak alaituta.
Arratsaldean, zezenak atera ziren plazara, eta Aurrera dantza taldeak emanaldia eskaini zuen. Ondoren, goxokiak banatu zituzten eta bertso poteoa egin zen tabernaz taberna. Musikak eta giro alaia ez ziren hor amaitu, Incansables txarangak kaleak alaitu baitzituen. Umeentzako festa ere ez zen plazan bukatu, buruhandiak kalez kale ibili baitziren, eta indarrak zituztenek zezensuzkoan parte hartu zuten.
San Tiburtzio jaien barruan, kontzertu berezi bat ere izan zen plazan, Maruxak taldearen eskutik. Ondoren, San Fifi eta Fefa Dj aritu ziren plazako txosnan. Goizaldera, berriz, ingurutxo ireki bat egin zen plazan nahi izan zuen ororentzat.
