Atzo jokatu zen mus txapelketa azkarra Martirietan, 32 bikotek parte hartuta, eta Arrasateko bikote bat izan zen txapeldun. Giro bikaina sortu zen auzoan. Gaur, larunbata, hasiko dira ofizialki Mendekoste jaiak auzo horretan. 19:00etan botako dute txupinazoa, eta ondoren trikipoteoa egingo dute, Garixe eta Trino trikitilariekin. 21:30ean hasiko da bertso afaria, non Maddi Agirre, Eneritz Artetxe, Aratz Igartzabal eta Ibai Urdangarin bertsolariek kantatuko duten.
Bihar, igandea, egun osoan izango da festarako aukera Martirietan. 10:00etan meza nagusia egingo dute Emeterio eta Zeledonio martirien ermitan, eta elizkizuna amaitutakoan, hamaiketakoa izango da Martitteko Bentan. 12:00etan, umeen pilota partidak jokatuko dituzte auzoko frontoian, eta 14:00etan bazkaria egingo dute. Arratsaldean, 17:00etatik aurrera, umeentzako jolasak izango dira Martirietako plazan, eta jolasak bukatutakoan merienda eskainiko dute. Egun osoan trikitilariek girotuko dute auzoa.
Aurtengoan ere, Herrigunetik Martirieta auzora igotzeko eta handik jaisteko autobus zerbitzua eskainiko dute. Gaur, 19:30ean, autobusa irtengo da San Martin kaleko geltokitik Martirietara, eta handik jaisteko autobusa 03:00etan izango da. Bihar, igandea, 11:00etan eta 16:30ean irtengo da autobusa herriguneko San Martin kaletik Martirietara, eta itzultzeko aukera 14:00etan eta 19:00etan izango da.
