Datorren ekainaren 18an eta 19an ospatuko den Jakin Jardunaldiaren aurkezpena egin da Usurbilen. Ekitaldiak, zeinak ueu.eus atarian du matrikulazio epea zabalik hilaren 16ra arte, euskararen adierazkortasunaren inguruko hausnarketa eta eztabaida sustatzea du helburu. Jardunaldiak duela lau urte gogoeta eta partekatzeko gune bilakatu direla nabarmendu du Aitor Bengoetxea Alkorta, UEUren zuzendariak, azpimarratuz "Euskarak batzen gaitu hemen gauden erakundeak, eta euskararen adierazkortasuna izango dugu aztergai aurten: ziur emankorra izango dela".
Agurtzane Solaberrieta Mesa, Usurbilgo alkateak, hitzordu hau "elkarrekin pentsatzen jartzen gaituztelako: herrigintzarako eta herri eraikuntzarako ezinbestekoa da" dela adierazi du. Aurtengo gaiarekiko kezka agertu du, "garai likido eta ezegonkor, hegemonia-erauntsi eta diglosia-egoera honen aurrean, ezinbestekoa da gutako bakoitzaren esanindarra handitzea, hizkera aberastea, hori ahoratzea, zabaltzea eta ondorengoei ematea; bestela, hiztun berriek ere laster ikusiko dute ez garela indartsu, eta nekez aseko ditu hizkera motel samar batek".
Haritz Azurmendi Arrue, Jakineko kideak, aurtengo edizioak "galdera batzuk eta kezka sozial batzuk" izango dituela abiapuntu azaldu du. Zehazki, "euskara bere adierazkortasuna galtzen ari ote den, edo behintzat gero eta gehiago kostatzen ari ote zaigun esanindarra euskaratik biltzea, esparru eta errealitate sozialak euskaratik izendatzea" dira jorratuko diren gai nagusiak.
Jardunaldiak, "Euskara esanindartzeko bidean: adierazkortasuna euskaraz lantzeko eztabaidak, gakoak eta hautuak" izenburupean, ekainaren 18an (09:00-17:30) eta 19an (09:30-14:30) izango dira. Matrikulazioa maiatzaren 11tik ekainaren 16ra arte egongo da zabalik, eta guztira 15 orduko iraupena izango du.
Egitarauak hainbat hitzaldi eta mahai-inguru jasotzen ditu. Besteak beste, Miren Amuriza Plaza k "Hizkuntzari gorputza nola eman. Literatura eta ahozkotasuna" landuko du; Amaia Alvarez Uria eta June Fernandez Casete k "Zein da mariokerren mintzoa? Sexu-genero disidenteak berba bila" aztertuko dute; eta Kike Amonarriz Gorria k "Adierazpen askatasunerantz, adierazpen eskastasuna gaindituz" hitzaldia eskainiko du. Gainera, hizkuntz teknologiak tresna gisa eta ahozkotasuna lantzeko esperientziak ere jorratuko dira.
Ostiralean, Iratxe Retolaza Gutierrez ek "Kulturen hizkerak, hizkeren kulturak: hautu linguistiko-ideologikoak kulturgintzan" gaia jorratuko du. Ondoren, mahai-inguruak izango dira euskarazko adierazkortasuna lantzeko eredu eta bideei buruz idatzian zein ikus-entzunezko formatu berrietan, Garazi Arrula Ruiz, Gorka Bereziartua Mitxelena, Danele Sarriugarte Mochales, Lander Arretxea Bereziartua, Ana Sarria Muxika eta Martin Ziarrusta Sanz bezalako adituekin.
Jardunaldiaren antolatzaileak Usurbilgo Udala, Jakin eta UEU dira. Informazio gehiago eta izen-ematea ueu.eus webgunean kontsulta daiteke.
