Garai udalerriak energia komunitatea sortzeko lehenengo pausoa eman du, eta horretarako Foru Aldundiak 15.125 euroko dirulaguntza esleitu dio. Diru horri esker, udalak hainbat jarduera antolatuko ditu komunitatea bultzatzeko, hala nola proiektuaren aurkezpen publikoa, prestakuntza saioak, azterlan bat egitea eta bazkidetzari ekitea.

Udalaren arabera, proiektu honek energiaren kontsumoa aurrezteko, energia berriztagarrien erabilera sustatzeko, udalaren eta herritarren arteko lankidetza indartzeko eta ingurumena zaintzeko balioko du. Gainera, gogorarazi dute Garaiko frontoian eguzki-plakak jarri zituztela 2021ean, eta kirolguneko instalazioak aerotermiagaz hornituko direla.

Garaiko Udalak, EAJren gobernu taldeak zuzenduta, konpromisoa zuen legegintzaldi honetan energia komunitatea eratzeko, eta horretarako diru-partida bat prestatu zuen 2026ko udal aurrekontuetan. Udal iturriek adierazi dutenez, oposizioak (Herriko Taldea) ez zuen ekarpenik egin eta bozketan abstenitu egin zen.