Aurten, kanpainaren ardatz nagusia 40 eta 70 urte bitarteko emakumezkoen kolektiboa izango da. Osasun publikoaren ikuspegitik, talde hau lehentasunezkoa da, izan ere, adin bereko gizonekin alderatuta, maiztasun txikiagoarekin hasten dira erretzeari uzteko tratamenduak. Guillermo Herrero, Osasun Publikoaren eta Adikzioen zuzendariak, eta Sonia González, Osakidetzako osasun komunitarioko erizainak, politika publikoak kontsumoan agertzen diren genero-desberdintasunetara egokitzeko beharra azpimarratu dute.
Gogorarazi dutenez, "tabakoaren kontsumoa kaltegarria da modalitate guztietan, eta ez dago kontsumo-modalitate segururik, ezta tabakoarekiko, kearekiko eta aerosolekiko esposizio-maila segururik ere. Dituzten substantziak zein igortzen dituztenak toxikoak dira eta osasun-arazo larriak sorraraz ditzakete". Kanpainaren lelo nagusia, "Jo ta ke! Erretzeari utzi nahi badiozu, lagunduko dizugu", mezu argia helarazten du: erretzeari uztea posible da, eta Osakidetzak, osasun-sistema publikoak, laguntza eskainiko du baliabide egokien bidez.
Euskadik aurrerapen nabarmenak egin ditu tabakismoaren aurkako borrokan. Azken inkestaren arabera, 15-74 urteko biztanleen % 19,7k erretzen zuen egunero, inoizko daturik baxuena. Hala ere, jaitsiera ez da homogeneoa: gizonezkoetan orokorra den arren, adin ertaineko emakumeengan ez da horrelako joerarik ikusten. Bereziki kezka sortzen du 55-74 urteko emakumeen taldeak, non eguneroko kontsumoa % 3,8tik % 15era igo baita 2004tik 2023ra. Gainera, talde honetako emakumeek gutxiagotan jotzen dute uzteko tratamendua hasteko.
Tabakismoa mendekotasun fisikoaz gain, faktore emozional, sozial eta kulturalekin lotuta dago. Emakumeengan, estresarekin, zainketen zamarekin eta kudeaketa emozionalarekin lotura handiagoa du, eta testuinguru pribatuagoetan gertatzen da. Horrek guztiak kanpainen beharra indartzen du, emakumeen bizi-esperientziara egokituak.
Emakumeengan tabakismoaren ondorioak intentsitate handiagoz agertzen dira; 2001etik 2020ra, emakumeen artean tabakoari egotzitako heriotza-tasa % 98 igo da, gizonezkoetan % 29 jaitsi den bitartean. Nerabeen artean, tabakoaren kontsumoa jaitsi bada ere (% 20tik % 18ra), zigarro elektronikoen erabilerak gorakada nabarmena izan du (% 13tik % 20ra).
