Euskotreneko Burdinbidearen Euskal Museoak, Eusko Jaurlaritzaren sozietate publikoak, tren historikoen bidaien eskaintza handituko du abuztuan. Asteburuetan lurrun-trenaren ohiko hiru irteerak mantenduko dira, eta lanegunetan, asteartetik ostiralera, dieselezko lokomotorren zirkulazioak gehituko dira. Dieselezko trenak 12:00etan eta 17:30ean irtengo dira, eta museoaren egoitzaren eta Lasaoko geltokiaren arteko 4,5 kilometroak egingo dituzte.
Zirkulazio berri hauek museoaren ohiko denboraldiko eskaintzara gehituko dira. Eskaintza honek barne hartzen ditu lurrun-trenaren hiru irteerak asteburu guztietan, azaroara bitartean.
Burdinbidearen Euskal Museoaren instalazioetan trenbideekin lotutako Europako bildumarik onenetakoa ikus daiteke. Bertan, lurrun, diesel eta tren elektriko bidezko makinak, automotorrak eta askotariko bagoiak daude. Horrez gain, Euskadiko makina-erremintako bildumarik osatuenetako bat eta XIX. mendetik aurrerako treneko uniformeak eta munduko tren-erlojuen bildumarik onenetakoa ere ikusgai daude.
Museoaren ordutegia asteartetik larunbatera 10:30etik 14:00etara eta 16:00etatik 19:30era da. Igande eta jaiegunetan (astelehenak izan ezik), 10:30etik 14:00etara dago zabalik.
Informazio gehiagorako, Julián Elorza 8 (20730 AZPEITIA-GIPUZKOA) helbidera jo daiteke, edo 943 15 06 77 telefono zenbakira deitu.
