Haujijijai festa batzordeak urteroko hitzorduei ekin die berriro ere, San Inazio bezperako herri bazkaria eta umeen eguna antolatuz. Ekintza horien berri emateko eta izena emateko informazio mahaia jarriko dute uztailaren 16an, ostegunean, eta uztailaren 17an, ostiralean, plaza nagusian. Mahaia 11:30etik 13:30era eta 17:30etik 20:30era egongo da zabalik.
Umeen eta gaztetxoen eguna, uztailaren 26an ospatuko dena, ekintzez betea egongo da. Antolatzaileek bazkaria, jolasak eta kalejira prestatu dituzte. Gaztetxoak 13:30ean elkartuko dira beren mailei dagozkien guneetan: HH4 eta HH5ekoak plazako eskaileretan, LH1 eta LH2koak Done Jakue kaleko parkean, LH3 eta LH4koak Frontoi Txikian, eta LH5 eta LH6koak ludoteka aurrean. Bazkaldu ondoren, Marea Arroxak antolatutako jolasak eta kalejira izango dituzte.
Ekintzetan parte hartu nahi dutenek uztailaren 16an eta 17an jarriko den mahaian eman beharko dute izena, 5 euro ordainduta. Izena emateaz gain, Marea Arroxaren kamiseta berria erosteko aukera ere izango da; kamisetak uztailaren 26an banatuko dituzte.
Bestalde, herri bazkaria uztailaren 30ean izango da, 15:00etan, plazan. Bertan parte hartzeko txartelak ere aurreko egunetan jarriko den mahaian erosi beharko dira. Bazkariko txartelak 10 euro balio ditu, eta kamisetak 5 eurotan eskuratu ahal izango dira; zapiak, berriz, 3 eurotan. Kamisetak herri bazkarian bertan banatuko dira.
Aurtengo festetan ere ez dira faltako kuadrillarteko jolasak. Abuztuaren 1ean egingo dituzte olinpiadak, 18:30ean, eta horietan izena emateko aukera herriko tabernetan, Haujijijai batzordearen sare sozialetan edo informazio puntuan bertan egongo da.
