Idiazabalgo Gurutze Berri auzoak aro berri bati ekin dio, atzo arratsaldean berrituta eta ukitu modernoago batekin inauguratu ondoren. Bi urtez luzatu dira lanak eta 2,2 milioi euroko aurrekontua izan dute.
Auzoaren 60. urtemugarekin bat eginez, Idiazabalgo Udalak auzoa eraberritzeko eta berrurbanizatzeko lanak egin ditu. Iñaki Alberdi alkateak azaldu zuenez, udalaren azken urteetako proiekturik garrantzitsuena izan da. Azpiegitura guztiak berritu dira, auzoa biziberritu eta egungo estandarretara egokitzeko helburuarekin.
“"Azpiegitura guztiak berritu dira, eta lan hauekin auzoa biziberritu eta egungo estandarretara egokitu nahi izan dugu."
Berrurbanizatze lanak 2023ko irailean hasi ziren. Hoditeria eta kableatuak berritu dira, argiteria guztia LED sistemara egokitu da eta kaleen asfaltoa eta espaloiak ere bai. Irisgarritasuna hobetu da eta oinezkoei lehentasuna eman zaie eremu osoan. Horrekin batera, zenbait berdegune berri eta jolas parke berria ere egin dira, estalpearekin.
Lan hauen kostua 2,2 milioi eurokoa izan da. Kopuru horren zati handi bat, erakunde ezberdinetatik lortutako dirulaguntzen bidez finantzatu da: Erein-etik 830.800 euro jaso dira, eta Gipuzkoako Urak erakundeak beste 171.000 euro jarri ditu. Gainontzekoa, 1.220.000 euro, udalak hartu du bere gain, 520.000 euro fondo propioetatik eta 700.000 mailegu baten bidez.
Gurutze Berri auzoa herri ekimenez sortu zen 60ko hamarkadan, 1964 eta 1965 urteen artean. Industrializazio garai betean, hainbat herritar elkartu eta kooperatiba sortu zuten etxebizitza beharra ikusita. Hasieran 22 bazkide ziren eta azkenean 36 elkartu ziren, sei eraikin eginez.
