Mugikortasun Jasangarri sailburu Susana Garcia Chuecak, Miguel Angel Paez Azpiegituretako sailburuordearekin eta Antonio Lopez ETSko zuzendari nagusiarekin batera, bisitatu du gaur goizean Kontxako tren azpiegitura. Joandako astean Loiola eta San Martin kaleetan martxan jarritako urbanizazio lanak ikusi ondoren, Loiolako sarbidetik lur azpira sartu dira, terminalaren panoramika eta hainbat gremio elkarrekin lanean ikusteko.
Alderdi teknikoa amaituta, orain instalazio elektrikoak, aireztapenak eta seinaleak muntatzen ari dira. Kontxako geltokian, Loiolako kanoia ia amaituta dagoen bitartean, Xabier Zubirirenean eskailera mekanikoak eta altzairu beiraztatuzko estaldura muntatzen ari dira.
Amarako geltokian, berriz, obra zibila eta Autonomiako kanoia bukatuta, Errondoko kanoitik behin-behineko larrialdietako irteera egiten hasiko dira. Terminal honetan dagoeneko muntatuta daude ekipamendu elektriko nagusiak, argiztapen sistemak, suteen aurkako babes sistemak eta luminariak.
Azkenik, Bentaberriko geltokian, akaberak besterik ez dira falta. Argiztapen sistema eta suteen aurkako babes sistemak bukatuta daude tunelean, terminalean bertan eta larrialdietako irteeretan. Katenariaren euskarri guztiak ere muntatuta daude. Aireztapen ekipoak instalatzeke daude nasaren azpian eta larrialdietakoak, baina materiala bertan dago jada.
“"Datozen ehun urteetara begira diseinatutako obra eta zerbitzua da, eta garraio publiko jasangarriaren bidez konektatutako Gipuzkoako mugikortasuna aldatuko du."
Sailburuak nabarmendu du lurpeko pasabidearen 4,2 kilometro eta hiru geltoki berri horien bidez, hiria beste modu batera lotzeaz gain, maiztasuna handiagotu ahal izango dutela, trena zazpi minutu eta erdiro pasa ahal izango baita Añorga eta Pasaia artean. Halaber, etorkizuneko Gipuzkoaren “sinboloa” dela ere adierazi du. Topoa lurperatzeari esker, gainera, oinezkoentzat metro karratu asko irabazi direla ere gehitu du.
