Proiektu estrategiko honen lehen urratsak kiroldegiko sarrera eremua berritzea eta handitzea du helburu nagusi. Jarduketa honekin, espazioaren erabilgarritasuna eta irisgarritasuna hobetu nahi dira, eraikinaren energia eraginkortasuna areagotu eta haren irudia modernizatu.
Lanek, besteak beste, atondo nagusia eta lotutako pasabideak erabat eraberritzea, komunak egokitzea segurtasun eta irisgarritasun irizpide berriekin, gune tekniko eta administratiboak lekuz aldatzea, eta wifi gune berri bat zein atseden hartzeko espazio bat sortzea aurreikusten dute.
Derioko alkate Esther Apraizek proiektuaren garrantzia azpimarratu du, udalerrian martxan jarritako jarduketa estrategiko handienetako bat dela adieraziz. "Lehen urratsa emango dugu gure kiroldegia eraldatzeko eta udalerriari instalazio modernoagoak, irisgarriagoak, funtzionalagoak eta herritarren egungo zein etorkizuneko beharretara egokituagoak eskaintzeko", adierazi du.
Udalak kalitatezko kirol azpiegiturei eustea eta kiroldegia udalerriarekin batera garatzea du helburu. Eraldaketa hau hiru fasetan gauzatuko da, instalazioaren eguneroko jardueran eragina ahalik eta txikiena izan dadin.
Bigarren fasean, lurreko eremuan zentratuko dira lanak, eskola-taldeentzako aldagela berriak sortuz, abonatuen aldagelak hobetuz, muskulazio eta TRX guneak handituz, eta erabilera anitzeko zein talde-jardueretarako gelak egokituz. Hirugarren faseak, berriz, ur eremura bideratuko ditu hobekuntzak, aldagelak handituz eta eskola-taldeentzako gune berri bat sortuz.
Deriok 5 milioi eurotik gora inbertitu ditu 2019 eta 2025 artean kirol azpiegituretan, besteak beste, udako igerilekuetan, futbol zelaian eta beste hainbat eremutan egindako jarduketetan.
