Udazkeneko Stock Azoka martxan da Azpeitian, Bertan merkatarien elkarteak antolatuta. Gaur, 16:00etatik 20:00etara, eta bihar goizean (10:00etatik 14:00etara) eta arratsaldean (16:00etatik 20:00etara), 37 saltokik denboraldiz kanpoko produktuak eskainiko dituzte ohiko prezioak baino merkeago. Herritarrek aukera hau baliatzeko interesa agertu dute, eta dagoeneko hainbat erosle ikusi ahal izan dira saltokietan.
Horietatik bederatzi saltokik Azoka Plazan jarri dituzte postuak, eta gainerakoek beren dendetako atarietan. Azokak, gainera, hainbat jarduera osagarri ditu. Gaur, lehen erosketekin batera, Sanagustin eta Pastorkua tabernetan erabili ahal izateko pintxo-balioak banatuko dituzte.
Bihar, ekitaldi gehiago izango dira. Goizean, 12:00etatik aurrera, trikitilariak ibiliko dira kaleak girotzen. Aldi berean, plazan, Kids&Us akademiak ingelesezko antzerki saioa eskainiko die 3 eta 10 urte bitarteko haurrei. Arratsaldean, berriz, umeentzako tailerrak izango dira Balentina Agirre plazan, 17:00etatik 19:00etara.
Bertako ekoizleen azokak ere mantenduko dira, ostiraletan eta larunbatetan ohi bezala. Hala ere, dendarien postuekin batera, ekoizleen postuak plazan egongo dira, ez Azoka Plazan. Gainera, bihar, Egurnika proiektuak erakusmahaia jarriko du plazan egun osoan zehar, eta Kriston Burrundaie musika festak herriko doinuekin beteko ditu kaleak larunbat eguerditik aurrera.
