Aramaioko Irakurketa Klub Feministak bederatzi liburu irakurri ditu ikasturte honetan, eta joan den astelehenean egin zuen ikasturteko azken saioa. Saio irekia izan zen, eta bertan, Miren Amuriza idazlea izan zen gonbidatu nagusia, bere Pleibak lanaren inguruan hitz egiteko.
Saioak dinamizatzen dituen Ainhoa Aldazabal ek "ezinhobea" izan dela adierazi du ikasturte bukaera. "Saio irekia oso ondo irten zen, hogei lagun inguru elkartu ginen; ohiko taldekideez gain, beste hainbat ere etorri ziren eta oso pozgarria da hori", azaldu du. Amurizaren parte hartzea "luxu bat" izan dela gaineratu du, eta idazketa prozesuari, liburuari berari, anekdotei eta pasarteei buruzko xehetasunak partekatu zituztela.
Aldazabal ek 2018 ingurutik dinamizatzen du Irakurketa Klub Feminista. Hamar lagun inguru bildu dira ikasturteko saio gehienetan, eta taldea "handitzen eta berritzen" joan dela nabarmendu du. Hasierako kide batzuk mantentzen diren arren, kide berriak ere batu zaizkio taldeari, "aberatsa, anitza eta oso atsegina" izan den ikasturte honetan.
Aurten, emakume idazleen lanak ardatz hartuta, genero eta formatu askotako irakurgaiak landu dituzte: komikiak, poesia, itzulpenak eta euskarazko obrak. Aldazabal en arabera, bereziki esanguratsuak izan dira Detaile xume bat eta Etxe bat norberarena lanak. Lehenengoak, Palestinako emakumeen literaturari buruzko saio berezia ekarri zuen, Adania Shibli idazle palestinarraren lana dela eta. Bigarrenak, berriz, poesia eta saiakera uztartzen dituen "sakon eta mamitsu" gisa deskribatutako lanak harrera ona izan zuen taldean.
Irakurketak taldean partekatzearen balioa ere azpimarratu du Aldazabal ek. Bere iritziz, besteekin komentatzeak irakurketa aberasten du, interpretazio desberdinak entzuteko eta eztabaidatzeko aukera ematen baitu. Klubak ikuspegi feminista du oinarri, emakumeen literatura ezagutarazteko eta mundua beste begirada batzuetatik ulertzeko tresna gisa.
Aramaioko Irakurketa Klub Feminista Arabaiko Foru Aldundi aren programaren barruan antolatzen da, eta herriko liburutegia arduratzen da irakurgaiak eskuratzeaz.
