Berrizko Udala k hiru jardueraz osatutako egitaraua antolatu du LGTBIAQ+ komunitatearen aldeko lana ikusarazteko eta berdintasuna sustatzeko. Ekimenak joan den igandean, irailak 20, hasi ziren 'La misteriosa mirada del flamenco' dokumentalaren proiekzioarekin eta ondorengo solasaldi batekin.
Gainontzeko bi ekitaldiak urriaren hilabetean izango dira. Lehen hamabostaldian, urriaren 1etik 15era bitartean, 'Ni naiz naizena' argazki erakusketa egongo da ikusgai erakusketa gelan, Gehitu elkartearen eskutik. Hilaren 25ean, berriz, haurrei zuzendutako 'Izena duen guztia' antzezlana aurkeztuko dute Agirre jauregiko Ispiluen gelan, 17:30ean.
Udalak azpimarratu du aniztasunaren aldeko lana ez dela data zehatzetara mugatu behar, eguneroko jardunean landu beharreko konpromisoa dela sinetsita. Horregatik, LGTBIAQ+ errealitateak ezagutarazi eta berdintasuna zein errespetua sustatzeko helburuarekin antolatutako ekintzetan parte hartzera deitu ditu herritarrak.
