Amorebieta-Etxanoko Udalak datorren asteartean, urriaren 13an, hasiko ditu Karmen kaleko 11. eta 17. zenbakien arteko tartea berrurbanizatzeko lanak. Jarduketa honek Karmen 2.0 proiektuari jarraipena emango dio, eta helburua da erdigunea irisgarriagoa, jasangarriagoa eta herritarrentzat atseginagoa izango den espazio bat sortzea.
Lan berriaren ardatz nagusiak espaloiak zabaltzea, berdegune gehiago sortzea, oinezkoen mugikortasuna lehenestea eta ibilgailuen trafikoa murriztea izango dira. Horrela, udal gobernuak herriko ardatz nagusietako bat den Karmen kalea modernizatu eta herritarren bizi-kalitatea hobetu nahi du.
Berrurbanizazioa Konbenio kaleko bidegurutzetik Larrabide kaleko bidegurutzera bitartean egingo da. Proiektu honek 750.000 euroko aurrekontu zenbatetsia du eta lanak gauzatzeko epea sei hilabete ingurukoa izango da.
Obren baitan, espaloiak zabalduko dira oinezkoentzako erosotasuna eta segurtasuna handitzeko. Gainera, landaredia gehituko da zuhaitzak eta zuhaixkak landatuz, berdeguneak handituz eta airearen kalitatea hobetuz. Trafikoa baretzeko, oinezkoentzako pasabide goratuak jarriko dira eta ibilgailuen abiadura murriztuko da. Era berean, saneamendu-sarea berrituko da.
Azkenik, hiri-altzariak ere berrituko dira banku eta paperontzi berriekin, eta argiteria publikoa hobetuko da segurtasuna areagotzeko eta argi-kutsadura murrizteko.
“"Karmen 2.0 proiektuaren handitzea herri irisgarriago, jasangarriago eta pertsonentzat atseginago baten alde egiten dugun apustuaren beste erakusgarri bat da. Gure bizilagunen ongizatea eta bizi-kalitatea hobetzeko diseinatu dugu proiektu hau, baita herrigune dinamikoagoa eta ingurumenarekiko errespetutsuagoa sortzeko ere. Amorebieta-Etxano etengabe ari da eraldatzen, eta proiektu hau bide horren parte da."
Ainhoa Salterain alkateak proiektuaren garrantzia azpimarratu du, eta espero da herrigune bizigarriago bat sortzeko bidean aurrera egitea, mugikortasun aktiboa eta jasangarritasuna sustatuz.
