Amasa-Villabonako Kirol Hamabostaldiaren helburu nagusietako bat da kirola herritar guztientzat eskuragarri egitea, adina edozein dela ere. Horren harira, apirilaren 16an, ostegunean, hartubol izeneko kirolaren erakustaldia egingo dute Hernaniko taldeko ordezkariek Olaederra kiroldegian, 11:30ean.
Hartubola boleibolaren antzeko kirola da, baina desberdintasun nabarmen batekin: baloia jo beharrean, jokalariek elkarri pasatzen diote sarearen gainetik bota aurretik. Hernaniko taldeko Eusebio Lizarazu eta Jabier Arraztiok azaldu dutenez, kirol honek XIX. mendearen amaieran du jatorria AEBn. Hasiera batean Newcomb izena hartu zuen, New Orleansen sortu zen eskolaren omenez, eta gero newcomb edo cachibol izenez zabaldu zen Hego Amerikako herrialdeetan. Euskal Herrian, Hernaniko taldekoek hartubol izena eman diote.
Kirol honen ibilbidea Euskal Herrian Hernaniko KEk proposatutako proba batekin hasi zen 2021eko uztailean. Goiz Eguzki erretiratu elkarteko dozena bat lagunek interesa agertu zutenean, urte bereko irailetik aurrera taldea osatzea erabaki zuten. Ordutik, astearte eta ostegunetan, 10:00etatik 12:00etara, praktikatzen dute hartubola udal kiroldegian.
Hernaniarrak aitzindariak izan dira kirol hau Euskal Herrian praktikatzen. Lizarazu, Hernani KEko boleibol entrenatzaile ohia, izan da herriko hartubol taldearen bultzatzaile nagusia. Laugarren denboraldia hasi dute, eta taldea nabarmen hazi da: ia 50 lagun biltzen ditu, gazteenak 63 urte eta zaharrenak 88 urte dituela.
“"Hartubola praktikatzera animatzen diren hamar lagunetatik zortzi emakumeak dira. Behin ere kirola egin gabekoak dira, edo baloi bat ukitu gabekoak. Jarduera fisiko ohikoenak paseatzea, martxa nordikoa, pilates, mantentze-gimnasia, yoga eta horrelakoak izaten dira. Hartubolak beste urrats bat emateko aukera ematen du, adin guztietara egokitutako kirola baita."
Hartubola kirol kolektibo bat da, onura fisiko eta emozional ugari eskaintzen dituena. Jarduera fisikoa sustatzen du, harreman sozialak errazten ditu, dibertsioa eskaintzen du eta sistema immunologikoa hobetzen du. Gainera, erabilera terapeutikoa ere badu, gaitasun fisiko eta mentalak indartzeko, eta artritisak eragindako hezurren zurruntasuna eta ahultasuna arintzeko. Errehabilitazio fisiko eta mentalerako terapia gisa erabil daiteke, baita adingabe autistentzako edo arazo fisiko edo mentalak dituztenentzako ariketa gisa ere.
Hartubolak indar handia hartu du Hernanin. Iazko denboraldian, Madrilen egindako estatu mailako topaketetan parte hartu zuten, eta Hernanin bertan Hartu Kalea proiektua bultzatu dute. Udalak sustatutako Auzozaintza proiektuan ere parte hartzen dute, eta maiz antolatzen dituzte belaunaldiarteko topaketak.
Aurtengo denboraldia ere ekitaldiz beteta dator: Kataluniaren eta Euskadiren arteko topaketak egingo dituzte maiatzaren 4tik 10era Herrialde Katalanetan, eta estatu mailako bigarren topaketa Hernanin egingo da ekainaren 13an eta 14an. Lizarazuk eta Arraztiok adierazi dutenez, iazko arrakastaren ondoren, Hernanik hartu zuen aurtengo topaketa antolatzeko konpromisoa, ilusio handiz, nahiz eta ahalegin handia eskatuko dien.
Bien bitartean, hartubola zabaltzeko lanean jarraituko dute, eta Villabonako Olaederra kiroldegian egingo den erakustaldia horren adibide da. Lizarazuren eta Arraztioren nahia da adin guztietarako irisgarria den kirol hau ahalik eta gehien hedatzea Euskal Herrian.
