Joan den astea uda giroan amaitu ondoren, datozen egunetan tenperatura nabarmen igoko dela aurreikusten da. Horren harira, Euskalmet-ek abisu horia ezarri du astelehenetik asteazkenera arte, gutxienez, bero bolada dela eta. Abisu horiak baso sute arriskuari, tenperatura altu iraunkorrari eta muturreko tenperatura oso altuei lotuta egongo dira.
Meteorologia agentziak iragarritakoaren arabera, egunotan 30 gradutik gorako tenperaturak har ditzakegu. Gainera, hego-osagaiko haizearen intentsitateak baso-sute arriskua areagotzen du. Horregatik, abisu horia indarrean egongo da ostegunera arte, egun osoan zehar, tenperatura altu iraunkorrarekin eta baso sute arriskuarekin lotuta. Muturreko tenperatura altuengatik abisua, berriz, astelehenean eta asteartean izango da aktibo, 13:00etatik 20:00etara.
Asteazkenetik aurrera, tenperaturak zertxobait jaitsi arren, 25-30 gradu inguruan mantenduko direla espero da asteburura arte, uda sasoiko giro beroari eutsiz.
Baso-sute arriskua altua da, tenperatura altuagatik eta hego-osagaiko haizearen intentsitateagatik.
Egun zehatzetarako iragarpenak honakoak dira: astelehenean, Usurbil-en, zerua hodei gutxirekin egongo da, goi-hodei batzuekin, eta hego-ekialdeko haize ahul-bizia ibiliko da, bolada gogorrekin; arratsaldean brisa sartzeko aukera dago. Asteartean, antzeko egoera espero da, haizeak indarra galduko duelarik eguerdi partean. Asteazkenean, zerua hodei gutxirekin edo oskarbi egongo da, eta arratsaldean mendi inguruetan bero-hodeiak ager daitezke.
