Usurbil herri zaintzaileagoa bilakatzeko helburuarekin, 'Goazen Kalera' dinamika martxan da berriro urte hasieratik. Ekimen honek, Udalak eta beste eragile batzuek elkarlanean antolatuta, asteartero egingo diren ibilaldi osasuntsuak eskaintzen ditu. Lehenengo ibilaldia apirilaren 14 an izango da, Aginagan barrena.
Ibilaldiak asteartero egingo dira, 10:30 etik 12:00 etara, Usurbilgo herri eta auzoetan, tokian tokiko frontoitik abiatuta. Herri erdigunetik auzoetara joateko taxi zerbitzua egongo da, 10:15 ean Laurok liburu-denda parean. Ibilaldi bakoitzaren amaieran, Atalluko Oinarrizko Lanbide Heziketako sukaldaritzako ikasleek prestatutako hamaiketako goxoa dastatu ahal izango dute parte-hartzaileek.
Antolatzaileek ibilaldi osasuntsuen egutegi berria kaleratu dute, eta aurtengo edizioak nobedade garrantzitsu bat dakar: ekimena abuztura arte luzatuko da, eta jaiegunetan ere ez da etengo. Horrela, udan ohikoak diren zerbitzu etenaldiak eta ordutegi murrizketak arindu nahi dira, adinekoengan sor daitekeen bakardadea murrizteko.
Udan ohikoa izaten da hainbat zerbitzu itxi edo etetea, ordutegiak aldatzea, denden ordutegiak murriztea, herria hustea... eta horrek adinekoengan sortzen duen bakardadea arintzeko eskaintza egin zen. Zaintza ekosistemaren barruko zerbitzuen lantaldeak eskaintza berri bat egitea proposatu zuen: ordura arte ez bezala, Artzabalgo Eguneko Arreta zerbitzua abuztuan ere eskaintzeaz gain, astean behin, paseo motz bat eman eta kafe baten bueltan tertulian aritzea proposatu zuten: harrera beroa izan zuen, 35 bat herritarrek parte hartu baitzuten saio horietan. Hala, ekimenaren balorazio positiboa eginda, aurten ere errepikatzea erabaki da, eta, ikaslerik gabe bada ere, udako asteroko hitzorduak ezarrita daude, dagoeneko, egutegian.
Ibilaldi hauek herri osoari zuzenduta daude, eta edonork parte har dezake doan, aurrez izena eman beharrik gabe. 'Goazen Kalera, Usurbil' ekimenaren helburua ariketa fisikoa egiteaz gain, belaunaldi arteko harremanak eta elkarren arteko zaintza sustatzea da, antolatzaileen arabera.
