Usurbilgo herri nortasunean eta bertan abian diren proiektu eraldatzaileetan oinarritutako turismo eskaintza sustatzen jarraituko du udaberri honetan ere 650 Usurbil Bizi herri egitasmoak. Ekaina amaierara arteko eskaintza plazaratu du, apirilean zazpi bisita gidatu eta maiatzean gutxienez hiru antolatuz.
Lehen bisita gidatua apirilaren 11 rako dago aurreikusita, herriko kaleetako kultur sorkuntza ezagutzeko eta ondoren Txikierdiko Zumeta Arte Estudiora joateko. Hitzordu horiek Usurbilgo kaleetako kultur sorkuntza, Salbatore elizako ondarea, sagardoaren kultura, tokiko zaintza eta hondakinen kudeaketa ereduak sakonago ezagutzeko aukera emango dute.
Nobedadeen artean, Jokin Eizagirre "Txitxo" herritarraren Polen izeneko erakusketara bi bisita gidatu antolatu dira. Erakusketa Sutegin dago zabalik martxoaren 20 tik apirilaren 19 ra arte, eta tamaina handiko olio-pinturak eta eskulturak biltzen ditu. Bisita horietako bat Museo Irekiarekin konbinatuko da, eta bestea artistak berak komentatuko du.
Artistak berak azalduko du bere lana, sorkuntza-prozesua eta piezen atzean dauden ideiak.
Erakusketaren ardatza naturan oinarritzen da, polena hedatzen den bezala, kolorea eta materia espazioan zehar zabaltzen direlarik, bizitzaren eta sorkuntzaren hasiera irudikatuz. Polen erakusketa apirilaren 20 ra arte egongo da zabalik Sutegin, astelehenetik ostiralera 17:00etatik 20:00etara, eta larunbat eta igandeetan 11:30etik 14:00etara eta 17:30etik 20:00etara.
Gainera, hilabete amaieran bertso ibilaldi bat antolatu da Alkartasuna Kooperatibakoekin batera Aginagako eta Txokoaldeko sagastietan barrena, Jakoba Errekondoren argibideekin eta Maialen Lujanbio zein Andoni Egaña bertsolariekin.
