Klubaren zuzendaritza berriak, denboraldia amaitzear dela, balantze oso positiboa egin du. Hasierako egokitzapen fase baten ondoren, klubaren egunerokoa eta dinamikak ezagutzeko, zuzendaritzak jende askoren laguntza izan duela adierazi du, eta aurreko kudeatzaileei eskerrak eman dizkie utzitako klub sendoagatik.

Denboraldi honetako lorpen nagusietako bat mutilen lehen taldeak 1. Nazional mailan mantentzea izan da. Maila hori kirol eta antolakuntza aldetik oso zorrotza dela azpimarratu dute, eta taldeak lehiatzeko gaitasuna duela frogatu duela. Lehen taldearen arrakastak harrobian ere eragin zuzena duela gaineratu dute, gaztetxoei erreferenteak eskainiz eta maila altuan jokatzeko motibazioa sortuz.

Harrobiko taldeek ere denboraldi bikaina izan dute. Jubenil mutilek Gipuzkoako txapeldunorde izan dira, kadete mutilek Gipuzkoako txapeldun eta Euskadiko hirugarren, eta kadete nesken bi taldeek ere urte ona egin dute, bata Gipuzkoako Kopako txapeldun eta bestea txapeldunorde. Emaitza horiek klubaren barruan urte askotako lanaren isla direla adierazi dute, eta jokalariak hazten ikustea eta talde giro ona baloratzea garrantzitsuagoa dela emaitzak baino.

Asteburu honetan, kadete mutilek Espainiako txapelketa jokatuko dute Iruñean, eta Barça izango dute aurkari. Esperientzia paregabea izango dela aurreikusten da, eta Usurbil bezalako herri txiki batentzat ohore handia dela horrelako lehiaketa batean parte hartzea. Jubenil mutilek ere Euskal Ligara igotzeko fasea jokatuko dute, eta klubarentzat pauso handia litzatekeela adierazi dute.

Etorkizunari begira, klubak erronka ugari ditu, besteak beste, harrobia sendotzen jarraitzea, entrenatzaile eta boluntario gehiago erakartzea, eta emakumezkoen eskubaloia indartzea. Halaber, herrian klub bakarra osatzeko proiektuaren inguruko eztabaida irekita dagoela adierazi dute, eta horrelako proiektuek denbora, lasaitasuna eta adostasuna behar dituztela azpimarratu dute.