190 familia-unitatek hartu dute parte zozketan. Saioa irekia izan da eta udalaren webgunetik zuzenean jarraitzeko aukera ere egon da. Parte hartu duten familia-unitate guztiek dute zozketaren emaitza ikusteko aukera SMS bidez jaso duten kode baten bitartez.
Etxebizitza egokitu zaionak udalaren jakinarazpena jasoko du. Baldintza guztiak bete beharko ditu: Oiartzunen erroldatuta egon, etxe-premia ziurtatu eta diru-sarreren muga ez gainditzea. Hala badagokio, 20 eguneko epean (10 eguneko luzapena eskatzeko aukerarekin) beharrezkoa den dokumentazioa eskatuko dio udalak esleipendunari.
Zozketa Landetxera etorritako ikusle boluntario batekin egin da. Lehenik etxebizitza esleitzeko zenbaki-bola atera du; ondoren, berriz, itxarote-zerrendaren hurrenkera zehaztekoa. Azken zenbaki hori duen interesduna da itxarote-zerrendan lehena.
Joana Mendiburu Garaiar alkateak eman dio sarrera ekitaldiari, eta gogorarazi du urrian jarri dela martxan etxebizitza bulego ibiltaria Oarsoaldean, lau udalen eta Oarsoaldea Garapen Agentziaren lankidetzan. Oiartzunen astearteetan egoten da, udaletxeko beheko solairuan, eta doako zerbitzua da, aurrez hitzordua hartuta.
Helburua da etxebizitzaren arloko informazioa, orientazioa eta izapideetarako laguntza eskaintzea herritarrei, bai etxe bila dabiltzanei, maizterrei zein etxejabeei. Babes ofizialeko etxebizitza eskuratzeko Etxebide eta Alokabide programak, etxebizitza alokairuan jartzeko ASAP eta Bizigune programak, etxebizitza eraberritzeko eta irisgarri egiteko dirulaguntzak eta lokalak etxebizitza bihurtzeko aukerak dira jorratzen diren gaietako batzuk.
Etxebizitza tasatuen udal erregistroan izena emateko epea beti irekita dago. Salmentarako etxebizitza tasaturik egonez gero, hiru hilean behin egiten dira zozketak. Herritarren Arreta Zerbitzurako bulegora joan behar da izena ematera.
