Lezoko Udala k Baratze Parkeko herri-baratzeen erabilera-esleipenak berritzeko prozesua jarri du martxan, egungo lursailen erabilera-epea abenduaren 31n amaituko baita. San Pedro auzoko eremu horretan, lezoarrek urteak daramatzate ekimenean parte hartzen, norbere barazkiak era ekologikoan landatzen eta aisialdi aktiboaz gozatzen.
Oraingo honetan San Pedro auzoan dagoen Baratze Parkeko 58 partzela egongo dira eskuragarri eta erabilera-lizentziek gehienez sei urteko iraupena izango dute, 2032ko abenduaren 31ra arte. Interesdunek azaroaren 20a (hori barne) baino lehen aurkeztu beharko dute eskaera.
Prozesuan parte hartu ahal izateko, besteak beste, Lezon erroldatuta egon eta gutxienez hiru urte lehenagotik bertan bizi behar da. Horrez gain, deialdiko gainerako baldintzak bete eta eskatutako dokumentazioa aurkeztu beharko da. Deialdia Lezoko Udaleko iragarki-taulan kontsulta daiteke formatu fisiko eta digitalean.
Eskaerak Lezoko Udaleko HAZ Bulegoan aurrez aurre edo Egoitza Elektronikoaren bidez aurkeztu beharko dira.
Esleipen-prozesuaren inguruko informazioa emateko eta zalantzak argitzeko, Udalak bilera deitu du azaroaren 12rako, 18:30ean, Kultura Aretoan (Donibane kalea 2). Saioan, prozesu berriaren xehetasunak azaltzeaz gain, Baratze Parkeari lotutako beste gai batzuk ere jorratuko dira, eta erabiltzaileen ekarpenak eta proposamenak jasotzeko aukera izango da.
