Lezoko Jai Batzordeak 25 ekitaldi baino gehiago prestatu ditu datozen Mendekosteetarako, maiatzaren 22tik 24ra bitartean. Lezoko Udalaren laguntzarekin, egitarau zabala osatu da, adin eta gustu guztietarako proposamenekin, herriko kaleak musikaz, kolorez eta jardueraz betetzeko helburuarekin.
Aitzol Saizar Viaña Kultur zinegotziak eskerrak eman dizkie Jai Batzordeko kideei eta eragileei, eta nabarmendu du "jai herrikoiak herriarenak direla", auzolanean oinarritutako antolakuntza sendoa dagoela azpimarratuz. Hilabete luzez landutako egitaraua herriko taldeen konpromisoari esker gauzatuko da.
Aurten ere, ostiralean iritsiko dira Zabarre eta Maria Labaien Lezora. Portutik lehorreratu eta kalejiran joango dira plazaraino, pirata giroa herrian zabalduz. Pirata txikien pregoiarekin emango zaie hasiera ofiziala festei, eta igandera arte etengabeko jarduerak izango dira. Jai Batzordeak herritarrak animatu ditu kaleak "musikaz, kolorez, errespetuz eta alaitasunez" betetzera.
Ainhoa Salaberria Garmendia kultur teknikariak azaldu duenez, programak askotariko ekintzak jasotzen ditu. Ostiraleko afari autogestionatu herrikoia izango da hitzordu nagusietako bat, baina ez dira faltako kirola, kultura eta kale animazioa ere. Arkirun Klubeko finalak, buruhandi eta erraldoien kalejirak, dantza emanaldiak, kontzertuak eta kale ikuskizunak izango dira hiru egunetan zehar.
Antolatzaileek berdintasunari eta errespetuari arreta berezia jarri diete. Jaiak Mugimendu Feministak urte osoan egiten duen lanketaren emaitza dira, eta aurten ere indarkeria matxistaren aurkako baliabideak aktibatuko dituzte. Ostiral eta larunbat gauetan, 00:00etatik 06:00etara, arreta eta salaketarako telefono zenbaki bat egongo da martxan: 688 696 204. Antolatzaileek gogorarazi dute jaiak espazio seguruak izan behar direla.
Hondakin kopurua gutxitzeko neurriak ere hartuko dira, hala nola edalontzi berrerabilgarrien sustapena gune batzuetan. Herritarrei dei egin diete kaleak garbi mantentzeko eta jaiak modu arduratsuan bizitzeko. Ospakizunak komunitatea indartzeko eta herritarren arteko harremanak sendotzeko aukera direla nabarmendu du Jai Batzordeak.
Mendekosteetako programa Lezoko Udalaren webgunean eta aplikazioan dago ikusgai. Saizarrek herritarrak pirata jantziak prestatzera animatu ditu, "gazte, heldu, haur eta tarteko guztiak", Zabarre eta Maria Labaieni ongietorria egiteko eta Mendekosteak gogoz ospatzeko.
